"Англи хэл" төслийн хүрээнд Улаанбаатар хотод сургалт зохион байгууллаа 

Дэзэрэт олон улсын энэрлийн байгууллага нь Нийслэлийн Засаг даргын Тамгын газартай байгуулсан санамж бичгийн хүрээнд Бригам Янгийн Их Сургуулийн Англи хэлний төвтэй хамтран 5 дугаар сарын 4-ний Даваа гарагт Англи хэлний багш нарын заах арга зүйг сайжруулах сургалт зохион байгууллаа.

Энэхүү сургалтад Нийслэлийн Боловсролын газраас Нийслэлийн ерөнхий боловсролын сургуулиудын төлөөлөл 50 гаруй багш хамрагдсан бөгөөд сургалтыг Бригам Янгийн Их Сургуулийн TESOL, хэл шинжлэлийн профессор, доктор Грант Экстайн удирдан явуулав. Багш нар сурагчдынхаа англи хэлний мэдлэгийг дээшлүүлэхэд шинэ санаа, үр дүнтэй арга зүйд суралцсан, үр дүнтэй сургалт болсон талаар сэтгэгдлээ хуваалцсан юм.

12-р ангид эхний жилдээ англи хэлний хичээл зааж буй багш Оюунчимэг хэлэхдээ: “Миний хувьд их сорилттой жил байсан. Эндээс шинэ санаа, сонирхолтой заах арга барилд суралцах зорилготой ирсэн бөгөөд сэтгэгдэл үнэхээр өндөр байна” хэмээн хуваалцав.

Доктор Экстайны сургалт нь унших, бичих чадварыг үр дүнтэй заах арга зүйд төвлөрсөн бөгөөд тэрээр хичээл нь зөвхөн сурагчдаар текст уншуулахаас илүү өргөн хүрээнд төлөвлөгдөх ёстойг онцолж, “Схемын онол”-д тулгуурлан сурагчдын өмнөх мэдлэг, туршлагыг идэвхжүүлэх нь ойлголтыг мэдэгдэхүйц сайжруулдгийг тайлбарлав. Мөн уншихын өмнөх, унших явцын болон уншсаны дараах үе шат бүрд сурагчдыг чиглүүлэх аргууд, бичих чадварыг олон төрлөөр хөгжүүлэх практик санаануудыг танилцууллаа.

Доктор Экстайн хэлэхдээ: “Бидний хамгийн чухал үүрэг бол сурагчдад суралцах баяр баяслыг мэдрүүлэх явдал юм. Тэд баяр баяслыг мэдрэх үедээ уншихыг хүснэ, бичихийг хүснэ, улмаар хэл суралцах чадвартай болно” хэмээн онцлов.