Ахлагч Гонг хиймэл оюун ухааныг аюулгүй, ёс зүйтэй, найдвартай хөгжүүлэхэд туслахыг шашны нийгэмлэгүүдэд уриалав. 

Есүс Христийн Хожмын Үеийн Гэгээнтнүүдийн Сүмийн төлөөлөгч, ахлагч Гэррит В.Гонг 2025 оны 7-р сарын 29-ний мягмар гарагт Бүгд Найрамдах Турк Улсын Истанбул хотод болсон ”Шашны байгууллагууд энхтайвны төлөө” дэлхийн зөвлөлийн хуралд оролцож байхдаа шашны удирдагчдад хандан “Хиймэл оюун ухааны (ХОУ) эрин үеийн итгэл, ёс суртахуун, хүний нэр төр” сэдвээр үг хэлсэн юм.

Ахлагч Гонг “Бид технологийн болон ёс суртахууны хувьд өмнө нь судалж байгаагүй шинэ талбарт хөл тавьж байгаа яг энэ цаг үед гуйвшгүй итгэл дээр суурилсан ёс суртахууны зарчим, ёс зүйн үнэт зүйлсийг бүхий л талбарт гэрлийн хурдаар дэлгэрч буй ХОУ-тай зохицуулах нь юу юунаас илүү хэрэгтэй байна” хэмээн хэлэв.

Төлөөлөгч маань ХОУ-тай холбоотой гурван санааг хуваалцсан бөгөөд санаагаа хуваалцахдаа шашны удирдагчдыг ажил хэрэг болгохыг уриалсан юм.

Нэгдүгээрт. Нийгэмд ХОУ бол Бурхан биш бөгөөд байх ч боломжгүй гэдгийг ойлгоход нь туслах.

ХОУ-ы сургалт, өгөгдлийн эх сурвалж нь хязгаарлагдмал, хүчин мөхөс хүмүүний бүтээл бөгөөд Бурхан л сүнслэгээр өдөөгдсөн бурханлаг үнэнийг өгч чадна хэмээн ахлагч Гонг хэлэв.

Ахлагч Гонг “ХОУ-ыг бурхан мэт үзэхийг эрэлхийлж буй хүмүүс өөрийн мэдэлгүй орчин цагийн Бабел цамхгийг бүтээж байж болох юм. Мөрөөдлийн нийгмийг бүтээх эсвэл тэнгэрт хүрэх гэсэн хүмүүний оролдлого үргэлж бүтэлгүйтсээр ирсэн” гээд цааш нь “Бурханы хүүхдүүдийн хувьд аливаа платформ, технологи жинхэнэ бурханлаг харилцаа холбоог орлох боломжгүй” хэмээн мэдэгдэв.

Сүмийн ерөнхийлөгч Рассэлл М.Нэлсоны хэлсэнчлэн: “Илчлэл хүлээн авах эрх нь Бурханы хүүхдүүддээ өгсөн хамгийн агуу бэлгүүдийн нэг билээ”.

Хоёрдугаарт. ХОУ-ыг сайн сайхны төлөө ашиглах хэрэгсэл талаас нь ухамсартайгаар сонгож, уг зорилгоор ашиглах

Ахлагч Гонг “Бидний шашин шүтлэг, ёс суртахууны өв уламжлалын өгч чадах хамгийн сайхан зүйлс ... хамгийн хүнлэг, хүмүүнлэг зорилго, үнэт зүйлд маань хэрэгтэй. Шашны удирдагчдын хувьд бид зорилго тавин ‘хүмүүний хөгжил дэвшил, нийтийн хөгжил цэцэглэлт зэрэг нийтийн сайн сайхныг урамшуулан дэмжих алсын харааг дэлхий дахинд тодорхойлон хэлж, боловсруулан гаргаж болно.

Шашны удирдагчдын хувьд бид хүмүүстээ өнөө үед явагдаж буй ХОУ-ы өөрчлөлтийг хүлээн авахад бэлэн байж, үүнд дасан зохицож, үүнийг үр өгөөжтэйгээр ашиглахад тусалж чадна. Бид ХОУ-аас эмээдэггүй мөн үүнийг бүх зүйлийн шийдэл гэдэгт итгэдэггүй. Бид дагалдагчид болон цугларагсдадаа ХОУ-ыг зүй зохистой ашигласан тохиолдолд өдөр тутмын амьдралыг олон талаар адислах хэрэгсэл юм гэдгийг олж харахад нь тусалж чадна” гэв.

Гуравдугаарт. ХОУ-ыг ёс зүйн өндөр түвшинд, аюулгүй, найдвартай талаас нь хэрэглэх арга замыг баримлах

Ахлагч Гонг технологи эсвэл ХОУ-ыг хөгжүүлэгч цөөнх хэсэг ХОУ-ы ёс зүйн хэм хэмжээг дангаар тодорхойлох ёсгүй гэсэн юм.

Тэрээр “Бурхангүй үзэл газар авсан дэлхий ертөнцөд ч гэсэн газар газрын шашны итгэгчид төдийгүй иргэд ХОУ аюулгүй, найдвартай байхад хувь нэмрээ оруулахыг шашны болон ёс суртахууны удирдагчдаас хүсэж байна” гэв.

Төлөөлөгч маань шашны төлөөллийг бүхий л салбар, судалгааны хүрээлэн, иргэний болон төрийн байгууллагын болон олон үзэл баримтлал бүхий шашны бүлгүүдийн удирдагч, иргэдтэй хамт “ХОУ-ы хөгжүүлэлтийг үл өөрчлөгдөх зарчмууд болон ёс зүйн үнэт зүйлстэй уялдуулан холбох” ажил дээр хамтран ажиллахыг уриалав.

Download Photo